Ֆրանչիսկոս Պապ` 31 հոկտեմբեր 2016-ին Շուէտը պիտի այցելէ։

(Ռատիօ Վատիկան) Սուրբ Աթոռի մամլոյ գրասենեակը` երկուշաբթի 25 Յունուար 2016-ին հաղորդագրութիւն մը հրատարակեց որուն մէջ նշեց թէ Նորին Սրբութիւնը Ֆրանչիսկոս Պապ` յառաջիկայ 31 Հոկտեմբեր 2016-ին Շուէտի Լունտ քաղաքին մէջ­, իր մասնակցութիւնը պիտի բերէ Կաթողիկէ Եկեղեցւոյ եւ Լուտերական համաշխարհային դաշնակցութեան միասնական արարողութեան, Լուտերական բարեկարգումի 500-րդ տարեդարձի ոգեկոչումի ծիրէն ներս, որ նախատեսուած է  2017 թուականին։

 

Վերոնշեալ համամիութենական արարողութիւնը պիտի գլխաւորեն Ֆրանչիսկոս Սրբազան Քահանայապետը, Լուտերական համաշխարհային դաշնակցութեան նախագահ` Գերապայծառ Տիար Մունիպ Եունան եւ Վերապատուելի Մարթին Եունկը։ Արարողութիւնը առաւելապէս պիտի սատարէ Կաթողիկէ Եկեղեցւոյ եւ լուտերական Եկեղեցւոյ միջեւ երկխօսութեան ամրապնդման ու համամիութենական ուղեւորութեան գործընթացքին։